Ditame emitido pola Comisión Permanente non Lexislativa para as Relacións co Consello de Contas, sobre o Informe de fiscalización das contas do sector público da Comunidade Autónoma de Galicia correspondente ao exercicio 2007 (36716 08/ICON-0003) e propostas de resolución aprobadas
A Comisión Permanente non Lexislativa para as Relacións co Consello de Contas, na sesión do día 8 de outubro de 2010, á vista do Informe elaborado pola Ponencia , sobre o Informe de fiscalización das contas do sector público da Comunidade Autónoma de Galicia correspondente ao exercicio 2007, de conformidade co disposto nos artigos 116 e seguintes do Regulamento do Parlamento de Galicia, aprobou o ditame e as propostas de resolución seguintes:
D I T A M E
"Apróbase a Conta Xeral da Comunidade Autónoma de Galicia, correspondente ao ano 2007."
PROPOSTAS DE RESOLUCIÓN
Resolución núm. 1
O Parlamento galego insta a Xunta de Galicia ao cumprimento das recomendacións contidas no Informe de fiscalización emitido polo Consello de Contas, correspondente ao exercicio 2007.
Resolución núm. 2
O Parlamento galego insta a Xunta de Galicia a buscar formas de colaboración entre o Consello de Contas e o Tribunal de Cuentas para facilitarlles a rendición de contas en galego aos organismos e entidades e evitar a duplicidade de obrigas que teñen na actualidade. Neste sentido, instase a que as contas rendidas ao Consello de Contas se fagan en galego e teñan efectos á propia presentación ao Tribunal de Cuentas.
Resolución núm. 3
O Parlamento galego insta a Xunta de Galicia para que demande das deputacións provinciais unha mellora e reforzamento dos seus servizos de asesoramento e asistencia técnica, co obxecto de facilitar o cumprimento, por parte das corporacións locais, da rendición de contas xerais nos prazos legalmente establecidos.
Resolución núm. 4
O Parlamento de Galicia insta a Xunta de Galicia a que continúe traballando na liña de anticipar a rendición da Conta Xeral da Comunidade Autónoma ao Consello de Contas de Galicia, coa finalidade de que este poida aproximar os Informes da Conta Xeral ao exercicio en curso; incluíndo para elo a posibilidade de reformar o prazo establecido no Texto Refundido da Lei de Réxime Financeiro e Orzamentario de Galicia.
Resolución núm. 5
O Parlamento de Galicia insta a Xunta de Galicia a que informe anualmente ao Parlamento de Galicia, a través da correspondente comisión, das actuacións realizadas para facer o seguimento do cumprimento das recomendacións do Consello de Contas de Galicia.”
Santiago de Compostela, 8 de outubro de 2010
Pedro Puy Fraga
Presidente da Comisión
Alfredo Suárez Canal
Secretario en funcións da Comisión