Acordos da Comisión 1ª, Institucional, de Administración Xeral, Xustiza e Interior, celebrada o 15 de xaneiro de 2021

 

A  Comisión 1ª, Institucional, de Administración Xeral, Xustiza e Interior, na súa sesión do 15 de xaneiro de 2021, adoptou os seguintes acordos:

 

 

 

 

Sométese a votación por puntos:

 

1º) Puntos 1, 3 e 4, que resultan aprobados por 7 votos a favor, 0 votos en contra e 5 abstencións

 

2º) Punto 2, que resulta aprobado por 9 votos a favor, 0 votos en contra e 3 abstencións

 

O texto aprobado é o seguinte:

 

"O Parlamento galego insta a Xunta de Galicia a reivindicar a

ante o Goberno de España:

 

1. Un enfoque ambicioso e concreto na relación con Portugal que minimice os chamados "costes de contexto transfronterizo" para acadar un desenvolvemento económico e social óptimo dunha área especialmente castigada polo longo peche da frontera a pasada primavera.

 

2. Que a Estratexia Común para o Desenvolvemento Transfronterizo (ECDT) aprobada na XXXI Cimeira Ibérica de Guarda sexa progresivamente ampliada con novos proxectos que redunden no crecemento socioeconómico da Eurorrexión Galicia-Norte de Portugal así como en toda a frontera hispano-portuguesa.

 

3. Que Galicia participe activamente no mecanismo de seguimento das decisión adoptadas en Guarda, previsto nas Conclusións da Cimeira.

 

4. Que, consonte coa Lei 25/2014, de 27 de novembro, de Tratados e outros Acordo Internacionais, Galicia participe na celebración do Tratado de Amizade e Cooperación entre España e Portugal renovado, que responda á crecente densidade e profundidade das relacións bilaterias, previsto

tamén polas Conclusións da cimeira de Guarda".

 

 

 

Sométese a votación e resulta aprobada con modificacións respecto do texto orixinal, pola unanimidade dos 12 deputados e deputadas presentes.

 

O texto aprobado é o seguinte:

 

"1. O Parlamento de Galicia insta a Xunta de Galicia a dirixirse ao Ministerio de Xustiza para que adopte as medidas necesarias que permitan reducir a taxa de interinidade do persoal en xulgados, tribunais e fiscalías, procedendo á aprobación da oferta de emprego público para o persoal da Administración de xustiza, e en canto sexa posible con todas as garantías sanitarias á inmediata execución dos correspondentes procesos selectivos.

 

2. Asemade o Parlamento insta a Xunta de Galicia a:

a) Proceder a cobertura de todas as Baixas que, por incapacidade temporal, se produzan na Administración de Xustiza en Galicia nos corpos de auxilio, tramitación e xestión, conforme ao procedemento establecido nas normas.

 

b) A, sen mingua dos postos de traballo e previa deliberación coas organización sindicais, reducir a temporalidade do persoal ao servizo da Administración Pública Galega".