• O Parlamento de Galicia acolleu un pleno infantil organizado coa colaboración de Aldeas Infantiles SOS, no que participou alumnado de primaria de catro centros da  Comunidade

Santiago, 27 de febreiro de 2024.- O Parlamento de Galicia acolleu este mediodía un pleno infantil organizado coa colaboración de Aldeas Infantiles SOS baixo o título “Deputados por un día", no que participou alumnado de primaria de catro centros públicos da Comunidade: O Mosteirón (Sada) Gregorio Sanz (Ribadeo), Padrenda Crespos (Padrenda) e Pazos de Reis (Tui).

O presidente do Parlamento, Miguel Ángel Santalices Vieira, subliñou que a Cámara galega se sente honrada coa celebración de actividades deste tipo que poñen de manifesto a “capacidade de traballo" dos máis novos, dos que destacou cualidades como a “empatía, o traballo colaborativo, a oratoria ou a capacidade de análise".  Agradeceu o traballo diario do profesorado e a súa implicación para o desenvolvemento de actividades deste tipo.

Conciencia ambiental

Santalices felicitouse da “gran conciencia ambiental dos máis novos, unha excelente noticia nun momento decisivo para a humanidade, na medida en que o cambio climático se ten convertido nun dos principais retos aos que debemos facer fronte, tanto no plano individual como colectivo".

Logo de escoitar as intervencións do alumnado e coñecer as propostas máis votadas, o presidente do Parlamento considerou que o mundo do futuro será “un lugar máis habitable, máis respectuoso co medio ambiente e tamén máis solidario".

Abundando nesta idea, enfatizou que “somos un país solidario", como quedou acreditado coa resposta social derivada da traxedia rexistrada en Valencia en datas recentes.

Na súa intervención, o titular do Lexislativo galego  amosuse convencido  de que “temos canteira", tamén no ámbito parlamentario, garantindo a continuidade da democracia. “Canto máis vos esforcedes nos estudos, maiores serán as garantías de éxito no futuro, tanto profesionais como persoais", aseverou.

O Pleno infantil contou tamén coas intervencións da conselleira de Política Social e Xuventude da Xunta, Fabiola García; e do presidente de Aldeas Infantiles SOS España, Pedro Puig.  Asistiron, ademais, a vicepresidenta da Deputación Permanente, Elena Candia; deputadas dos tres grupos da Cámara e mailo director xeral de Familia, Infancia e Dinamización Demográfica.

Saúdos, Gabinete de Comunicación. ​