A exposición 40 anos de Autonomía de Galicia nas caricaturas de Siro viaxa ata Lugo

​

A exposición 40 anos de Autonomía de Galicia nas caricaturas de Siro viaxa ata Lugo

• A Sede Afundación desta cidade acolle esta exposición, na que se mostran 230 dos debuxos nos que durante anos plasmou a actualidade política de Galicia.

• Santalices agradece a xenerosidade de Siro López por ampliar as súa doazón á Cámara con máis de mil caricaturas.
  
   
• Esta selección dos orixinais doados exponse por terceira vez fóra das instalacións da Cámara.

Santiago, 4 de setembro de 2025. O presidente do Parlamento, Miguel Ángel Santalices Vieira, agradeceu hoxe en Lugo, durante a inauguración da exposición 40 anos de Autonomía de Galicia nas caricaturas de Siro, que o autor ampliase recentemente a doazón da súa obra á Cámara galega con 1.273 novas caricaturas, coas cales o número total se achega aos tres mil debuxos.

A exposición integra unha escolma dos debuxos doados polo artista e que foron publicados no xornal La Voz de Galicia case a diario durante máis de vinte anos.

Na súa intervención, o xefe do Lexislativo autonómico destacou a creatividade, a ironía e a retranca con que Siro López comentaba a diario a actualidade política, converténdose nun artista multidisciplinar con estilo propio e unha ampla traxectoria no ámbito da caricatura xornalística.

Exposición

A mostra, realizada en colaboración entre o Parlamento de Galicia, La Voz de Galicia e Afundación, reúne unha selección de 230 viñetas nas que se fai un percorrido por diferentes etapas transcendentais da historia política galega e os seus protagonistas, xunto coas páxinas do xornal no que apareceron publicadas.

A exposición quedará aberta ao público na Sede de Afundación de Lugo ata o vindeiro 11 de outubro, de luns a venres, en horario de 9 a 14 horas e de 17.30 a 20.30 horas, e os sábados de 11 a 14 horas e de 17 a 19 horas.

Saúdos, Gabinete de Comunicación

​