Proposicións non de lei aprobadas polo Pleno do Parlamento de Galicia o 12 de marzo de 2025

​​

Proposicións non de lei aprobadas polo Pleno do Parlamento de Galicia o 12 de marzo de 2025

4.1 538(12/PNP-000033)

Grupo Parlamentario Popular de Galicia

Sanz Arias, Cristina e 8 máis

Sobre a solicitude que a Xunta de Galicia debe dirixir ao Goberno central en relación co apoio ao futuro Xacobeo 2027 ao abeiro da Lei 49/2002, do 23 de decembro, de réxime fiscal das entidades sen fins lucrativos e dos incentivos fiscais ao mecenado.

Publicación da iniciativa, 9f1, 11.04.2024

O texto aprobado é o seguinte:

“O Parlamento galego insta a Xunta de Galicia a:

1. Solicitar ao Goberno de España a declaración do Xacobeo 2027 como acontecemento de excepcional interese ao abeiro do previsto Lei 49/2002 de réxime fiscal de entidades sen ánimo de lucro, e de incentivos ao mecenado, e con efectos desde o ano 2025"

2.  Deseñar un mapa territorial por toda a xeografía galega que chegue ao máximo número de concellos e cando menos a todas as comarcas galegas.

3. Facer unha distribución equitativa e igualitaria das actuación de maior impacto por todo o territorio.

4. Que o acceso aos distintos eventos sexan en igualdade de condicións."

4.3 20038(12/PNP-001597)

Grupo Parlamentario dos Socialistas de Galicia

Rodríguez Dacosta, María del Carmen e 2 máis

Sobre as medidas que debe adoptar o Goberno galego destinadas a mellorar a situación laboral das mulleres en Galicia

Publicación da iniciativa, 159f1, 19.02.2025

O texto aprobado é o seguinte:

O Parlamento de Galicia insta o Goberno galego a elaborar un plan de choque feminino destinado a:

1. Diminuír a fenda salarial existente entre as mulleres e homes de Galicia.

2. Deseñar medidas que contribúan a establecer un marco laboral de calidade no emprego, combatendo a desigualdade de acceso ás diferentes ocupacións.

 3. Incrementar a incorporación das mulleres nas ocupacións altamente masculinizadas, rachando o teito de cristal existente e facilitando a súa inserción laboral.

​ 

4.6 20603(12/PNP-001655)

Grupo Parlamentario Popular de Galicia

Arias Rodríguez, Raquel e 19 máis

Sobre a proposta de resolución que se presenta en relación coa vulneración do principio de igualdade de trato entre homes e mulleres e coa desvalorización dos cargos políticos baseándose unicamente no seu xénero.

Publicación da iniciativa polo procedemento de urxencia, 162f1, 26.02.2025

O texto aprobado é o seguinte:

“O Parlamento de Galicia acorda como Resolución:

1.- Reprobar esta campaña sexista levada a cabo pola CIG que claramente desvaloriza o traballo dun cargo político.

2.- Reprobar calquera manifestación que vulnere o principio de igualdade de trato entre mulleres e homes ou se denigre a dignidade das mulleres.

3.- Manifestar a súa vontade de que o Bloque Nacionalista Galego, a través da súa voceira a Sra. Ana Pontón, rexeite o contido sexista destes carteis."