A Comisión 6ª, Industria, Enerxía, Comercio e Turismo, na súa sesión do 20 de outubro de 2023, adoptou os seguintes acordos:
Procedementos de control e impulso
Proposicións non de lei en Comisión
Aprobación sen modificacións
- 59743 (11/PNC-004977)
Grupo Parlamentario Popular de Galicia
Sanz Arias, Cristina e 6 máis
Sobre a demanda dirixida á Xunta de Galicia co obxecto de que continúe apoiando a transformación e modernización do sector do comercio
BOPG n.º 565, do 20.09.2023
Sométese a votación e resulta aprobada sen modificacións por 10 votos a favor, 2 votos en contra e 0 abstencións.
O texto aprobado é o seguinte:
"O Parlamento de Galicia insta a Xunta de Galicia a continuar modernizando e transformando un sector tan estratéxico para a nosa comunidade como é o do Comercio, utilizando todos os instrumentos que facilita Europa para apoiar a súa consecución."
Aprobación por unanimidade sen modificacións
- 60757 (11/PNC-005078)
Grupo Parlamentario do Bloque Nacionalista Galego
Fernández Davila, María Cristina e 2 máis
Sobre as actuacións que debe impulsar a Xunta de Galicia para manter a actividade e os postos de traballo da empresa Madera Fiber Technologies, sucesora da filial de Faurecia e situada no Porriño
BOPG n.º 578, do 11.10.2023
Sométese a votación e resulta aprobada sen modificacións pola unanimidade dos 12 deputados e deputadas presentes.
O texto aprobado é o seguinte:
"O Parlamento de Galicia insta a Xunta de Galicia:
-A través da Consellería de Industria a:
a) Reunirse co Comité de Empresa en todas as ocasións que sexan precisas para coñecer a fondo a situación da empresa e dos traballadores/as.
b) Incidir na procura de empresas que podan estar interesadas no investimento na empresa, conservando a unidade produtiva e así os postos de traballo existentes.
-A través da Consellería de Emprego a mediar neste conflito coas persoas traballadoras da empresa Madera Fiber Technologies (ex Faurecia Interior Sytems), para atopar unha solución a esta situación e que permita así manter os máis de 100 postos de traballo."