Acordos da Comisión 5ª, Sanidade, Política Social e Emprego, celebrada o 5 de outubro de 2023

Procedementos de control e impulso

Proposicións non de lei en Comisión

Aprobación por unanimidade con modificacións

- 59201 (11/PNC-004948)

Grupo Parlamentario Popular de Galicia

Amigo Díaz, María Encarnación e 6 máis

Sobre a demanda dirixida á Xunta de Galicia co obxecto de que homoxeneíce en todas as áreas sanitarias o protocolo de atención aos nacementos por cesárea para permitir o acompañamento e a humanización dos partos

BOPG n.º 565, do 20.09.2023

Sométese a votación e resulta aprobada con modificacións respecto do texto orixinal, pola unanimidade dos 12 deputados e deputadas presentes.

O texto aprobado é o seguinte:

“O Parlamento de Galicia insta á Xunta de Galicia a elaborar unha guía que homoxeneice en todas as áreas sanitarias o protocolo de atención aos nacementos por cesárea para permitir o acompañamento no parto da persoa que a nai decida e para posibilitar o contacto pel con pel continuado co recen nado.

Esta medida será posta en práctica en todos os hospitais do Sergas no actual período de sesións".

Aprobación por unanimidade sen modificacións

- 44349 (11/PNC-003899)

Grupo Parlamentario dos Socialistas de Galicia

Torrado Quintela, Julio e Ortega Otero, Marina

Sobre a realización, por parte da Xunta de Galicia, dun estudo para incorporar progresiva e sistematicamente a figura de óptico e optometrista no Servizo Galego de Saúde

BOPG n.º 416, do 02.12.2022

Sométese a votación e resulta aprobada sen modificacións pola unanimidade dos 12 deputados e deputadas presentes.

O texto aprobado é o seguinte:

“O Parlamento galego insta a Xunta de Galicia a:

1. Realizar un estudo sobre a posible medida de incorporar progresivamente e sistematicamente  a figura de óptico e optometrista  no Servizo Galego de Saúde, así como ter en conta avaliacións sobre o tema realizadas polos colectivos implicados, que permitan planificar un calendario temporal desta estratexia.

2. Abrir unha mesa de diálogo co Colexio Oficial de Ópticos e Optometristas para avaliar posibles modificacións  na proposta de convenio para volver a integrar a unha maioría dos establecementos".​