O presidente do Parlamento participa na entrega do Premio Losada Diéguez 2016, onde pon en valor o “rexurdimento” que protagoniza a cultura galega

 
• Subliña a “significación especial” da edición deste ano do premio, que leva o nome dun dos impulsores das Irmandades da Fala, das que se conmemora o seu centenario
 
• Foron premiados Ledicia Costas, por Un animal chamado néboa, e Xosé Fernández Fernández, por Vicente Risco. Mestre de Mestres
 
Santiago, 11 de xuño de 2016.-  O presidente do Parlamento de Galicia, Miguel Ángel Santalices Vieira, participou este mediodía en Boborás (Ourense) no acto de entrega do Premio Antón Losada Diéguez 2016, que nesta edición recaeu nas obras Un animal chamado néboa, de Ledicia Costas, na modalidade de creación literaria; e en Vicente Risco. Mestre de Mestres, de Xosé Fernández Fernández, galardoado na modalidade de ensaio.
 
A xuizo de Santalices, os dous autores “son partícipes do rexurdimento da cultura galega”  na actualidade, ao tempo que os felicitou pola concesión do galardón que nesta edición cobra un “significado especial” na medida en que honra a memoria de Antón Losada Diéguez, un dos impulsores das Irmandades da Fala das que en 2016 se celebra o centenario da súa fundación.
 
En opinión do presidente do Parlamento de Galicia, Losada Diéguez e cantos participaron nas Irmandades da Fala primeiro, e en Nós e no Seminario de Estudos Galegos, despois, “abriron novas canles de estudo, investigación e difusión da cultura e a realidade galega nas súas diversas manifestacións”. Por iso, “a Galicia actual é o que é, en boa parte, grazas ao camiño aberto por eles”.
 
Recoñecemento colectivo
 
En opinión do presidente do Parlamento, “o bilingüismo da Galicia actual, a elevada capacidade de autogoberno que exerce a Comunidade Autónoma e o rexurdimento que protagonizan as diferentes manifestacións culturais –arte, literatura, creación audiovisual,…-  non son máis ca o resultado da sementeira impulsada por aqueles pioneiros  de hai un século, que gañaron a pulso o recoñecemento colectivo do noso pobo”.
 
De Ledicia Costas, a escritora galardoada nesta edición do Premio Losada Diéguez, Santalices destacou a “súa sólida carreira literaria” a pesar da súa xuventude”, poñendo tamén de relevo o crecente protagonismo feminino na literatura galega contemporánea. Ao tempo, valorou o “enfoque novedoso” sobre Vicente Risco da obra de Xosé Fernández Fernández, premiada na modalidade de ensaio.
 
Saúdos, Gabinete de Comunicación do Parlamento de Galicia.

Imaxes Relacionadas

Outras novas


Emisións en directo

Non temos emisións en directo neste momento.

Axenda

Na axenda atopará as ordes do día e a documentación das sesións desta Cámara, tamén poderá consultar o arquivo multimedia das sesións xa celebradas.

Calendario

LUNS 23
outubro de 2017
lunsmarmérxovvensábdom
1
2345678
9101112131415
16171819202122
23242526272829
3031
<< setembro| novembro >>

Información das Sesións

Lista de sesións do día 23/10/2017


© Parlamento de Galicia, 2011 | Rúa do Hórreo, 63 - 15701 Santiago de Compostela | Tel.: 981 551 300 Fax: 981 551 408