Saúdo da presidenta do Parlamento
Un espazo para a concordia
O 19 de decembro de 1981 constituíase, entre os centenarios muros do pazo de Xelmírez, a primeira lexislatura do Parlamento de Galicia. Hoxe,
transcorridos trinta anos desde a súa creación, e asentada desde hai algo máis de dúas décadas na súa sede definitiva do pazo do Hórreo,
a Cámara consolidouse plenamente como alicerce consubstancial da autonomía de Galicia.
Como galega, síntome especialmente honrada por poder exercer a Presidencia do Parlamento de Galicia, pero tamén son consciente da gran
responsabilidade que dela deriva e das elevadas expectativas que o conxunto da sociedade depositou no traballo que todas as deputadas e
os deputados desenvolvamos ao longo desta VIII lexislatura.
Nestes momentos de dificultade, a cidadanía galega agarda que o Parlamento de Galicia actúe como a auténtica ágora na que, a través da palabra,
se materialice o consenso nos grandes asuntos do país. Neste sentido, e con independencia das lóxicas diferenzas que distinguen os distintos
grupos políticos con representación parlamentaria, farei canto estea ao meu alcance para que, por enriba de todo, prime a concordia en beneficio
de Galicia e dos intereses supremos das galegas e dos galegos.
Con ese espírito, cantos integramos o Parlamento de Galicia esforzámonos cada día por achegármonos aos cidadáns e por dar a coñecer a actividade
que aquí desenvolvemos. Confío en que, neste labor, este portal na internet xogue un papel determinante.
Moitas grazas por esta visita virtual e benvid@s ao Parlamento de Galicia,
Pilar Rojo Noguera
Presidenta do Parlamento de Galicia
